中環出更：林建康太太寓旅行於教學
愛沙尼亞共和國駐港名譽領事林建康愛周遊列國，早前與太太黃寧艷、長子孝勇及次子孝政，一家四口登上超豪郵輪，暢遊地中海、蒙地卡羅及西班牙等，林太全程充當「百事通」，教囝囝認識航海知識，仲講解歐洲文化歷史，十足讓囝囝參加暑期遊學團，同行嘅仲有太子珠寶主席鄧鉅明一家三口。
林孝勇充滿體育細胞，林太安排佢上船前，先去倫敦參加運動營，順道探親，然後舉家再飛往葡萄牙里斯本，展開十二日郵輪之旅。林太將艘郵輪變成「流動教室」，教兒子觀星、看海浪、睇風向，天文地理知識共冶一爐，當去到意大利名勝比薩斜塔前，林太就諗起著名科學家伽利略曾喺塔上拋下球，做自由落體實驗，即席講古仔，孝勇聽到入晒神，話回港後要買多啲物理書研究吓。
行程咁多采多姿，林家齊齊喺羅馬許願池邊合十，祈求下次有緣再來。林生就不忘帶隊搵食，幫襯羅馬嘅Harry's Bar Roma，而西班牙巴塞隆拿嘅Can Fabes，係米芝蓮三星餐廳，林太食過都讚正斗。
鄧鉅明戒飯瘦5磅
對於今次旅行，鄧鉅明最開心係好多朋友都肥咗幾磅，惟獨佢瘦咗五磅。因為船上有位朋友教佢戒食飯、粉麵等澱粉質，鄧鉅明自言係食肉獸，結果十幾日食埋好嘢都可以激瘦五磅。大家可能同卓妮一樣，唔明點解鄧鉅明未聽過咁基本嘅減肥法？睇嚟鄧太Emily要過兩招Keep Fit妙方畀老公至得喇！