中環出更：廖長城撐青年雋士會
一班工商專業界青年近日發起成立一個培育青年嘅「雋士會」，創會主席何綺蓮（Elaine）人面廣，唔少政商界重量級人物都有出席成立典禮撐場，好似全國政協常委余國春、政協委員王國強、容永祺、譚錦球、王惠貞等，就連甚少現身嘅大狀廖長城（Andrew）都畀面坐足全場。
當日Elaine戴住西班牙品牌Arte黑寶石頸鏈出場，端莊又夠搶眼。Andrew同Elaine都係法律界精英，原來十年前已經結緣，仲經常一齊到內地交流訪問，特別啱嘴形。身兼行政會議成員嘅Andrew，早前趁住行會休會，去咗個短途旅行，同家人去咗東南亞行番轉，叉足電，難怪佢成個人精神晒。
典禮籌委會主席黃達強（Aston）同仁愛堂主席黃達東樣貌有幾分似，但Aston澄清同對方並非兩兄弟，佢話自己聽過對方嘅名，但就未見過真人。
卓妮又見到鄉議局當然執委蘇開鵬公子蘇灝（Herman），佢擔任雋士會副主席，佢今年剛滿三十歲，真係年輕有為。本身係馬主嘅Herman話，趁住馬季抖暑，終於可以做吓自己嘢。咁即係做啲乜呢？原來係執屋，佢話平時工作太忙，搞到間屋立立亂喎。
培養才智青年
至於雋士會嘅創會理念，Elaine話係希望透過各類型嘅青年活動，培養出一班「雋士」，即係才智出眾嘅人士咁解，未來該會將舉辦兩岸四地交流團、單車及攝影導賞生態遊等。
卓妮