一條問題唔識答
尋日九龍西嘅選舉論壇，毓民喺後半場發炮，佢話Ann蔣要政府硬推國民教育，就問佢識唔識五星旗五粒星有咩意義，Ann蔣答啱咗大個粒星代表共產黨，但四粒細星佢就話係代表「工農兵商」，即刻被毓民大叫「錯！」糾正佢頭兩粒星的確代表工人同農民，不過第三粒係小資產階級、第四粒係民族資產階級。
之後毓民唔肯放過Ann蔣，繼續問佢五十年代共產黨提倡嘅三面紅旗代表乜嘢，Ann蔣繼續唔識答。
其實三面紅旗係代表「人民公社、總路線、大躍進」，睇嚟Ann蔣都應該惡補吓。參選九龍西嘅仲有梁美芬、黃碧雲、毛孟靜、譚國僑、黃以謙、黃逸旭同林依麗。