中環出更：葉澍堃賀結婚周年 帶老婆升空
今個暑假，前經濟發展及勞工局局長葉澍堃（Stephen）送咗兩個第一次畀太太做結婚卅六周年禮物，第一次沖土耳其浴，仲首次登上熱氣球俯瞰奇山異石，快哉！唯一美中不足係無包到私人熱氣球同老婆享受二人世界。
嚟到土耳其嘅加柏都斯亞（Cappadocia），好難抗拒熱氣球嘅魔力，除咗可以喺一千米嘅高空上面，從高角度優哉游哉咁俯瞰呢個世界文化遺產之外，全盛時期仲可以一次過見到過百個色彩斑斕嘅熱氣球喺天空飄浮，雖然Stephen嗰日只係見到五十幾個，但已經覺得美不勝收，即使要朝早五點就到場都值得。Stephen話以前怕危險唔敢坐熱氣球，但依家年紀大，膽仲大咗。
唔試由自可，一試佢就愛上咗，Stephen坐嘅係四人一籃嘅熱氣球，佢上到半空見到私人包廂即時心癢癢，後悔無揀包廂同老婆二人世界。玩完熱氣球，佢哋又繼續欣賞奇山異石，仲入住建喺石洞入面嘅酒店，又喺石洞入面食飯，確係人生一個好特別嘅體驗。
歎土耳其浴擦走死皮
除咗熱氣球，Stephen最難忘第一次同太太一齊享受土耳其浴，先擦晒全身嘅死皮，再用泡沫喺全身爆破，由頭洗到落腳，最後過一次凍水，令皮膚收縮，感覺相當得意。Stephen話啲死皮畀人擦晒，連臉皮都無咁厚，所以依家識怕醜同會面紅喎。咁搞笑，怪不得葉太成日都眉開眼笑啦。
卓妮