體館保養差 逢雨漏不停
體育館天花漏水漏不停！馬鞍山體育館於颱風韋森特襲港後，被發現主場天花嚴重漏水，近半場館被迫封閉，現場水漬處處，場館使用者不約而同地指問題早已出現，質疑當局保養不力，令市民「有得睇，冇得玩」。區議員直斥康樂及文化事務署塞責，要求盡快進行徹底維修，還市民一個完善場館。
開放不足十年的馬鞍山體育館設有十二個羽毛球場，平日使用者眾，設施因天雨被封對無數市民帶來不便。
「嗰朝十二個場封咗九個，天花啲水梅花間竹咁不斷流落地下，水桶擺到好似個八卦陣咁都冇用！」愛好運動的李先生經常到上址與朋友切磋球技，早前突然接獲職員通知，指颱風過後場館漏水，要求已預訂球場者選擇退款。
「我都唔明點解每次落完雨，康文署啲職員就淨係識得擺水桶出嚟裝水，但就唔肯徹徹底底做維修、搞番好個場，係要整到有場冇得打至安樂？」李先生指場館過去已曾多次於雨天後漏水，不滿問題一直未有解決，且更有惡化之勢，質疑當局對於場地維修保養跟進不足，要求就事件給予合理解釋。
未交代滲漏源頭
康文署發言人承認，今年七月韋森特吹襲本港後，馬鞍山體育館職員先後發現四個羽毛球場天花有滴水情況，遂決定暫停開放及要求建築署跟進受影響場地。根據工程人員觀察，相信是次的滴水乃颱風及持續大雨造成，已於同月二十九日重新開放，惟就滲漏源頭則未有進一步交代，並堅稱過去一年場內從未發生漏水問題。
「康文署仲要將漏水問題賴畀個天，真係不知所謂！」李先生認為當局應盡快找出漏水源頭，並就滲漏問題作出補救，杜絕事件再次發生。
倘不維修勢惡化
香港專業教育學院（青衣）建造工程系系主任陳子明估計，上述漏水事件與天花坑板單駁口的接駁位出現破損、或螺絲鬆脫有關，令雨水從隙縫中滲漏，倘仍不進行徹底維修，情況勢將進一步惡化，他說：「如果繼續唔理佢，接駁口好容易因為再受到風雨同空氣嘅壓力影響，令罅隙變得愈嚟愈大，到時啲雨水就會好似開水喉咁流落地面。」
當區區議員李子榮認為康文署在事件中責無旁貸，理應吸取教訓，勿再重蹈覆轍，「任何建築物用得耐咗，出現損耗好正常，最重要係政府維修工夫有冇做足！」李要求當局盡快派員進行勘察，避免同類事件再次發生。
記者：伍思明