西九新動力立法會議員梁美芬博士為咗競逐連任，早前搵專人創作咗首叫做「快樂西九」嘅宣傳戰歌，仲話唔怕畀人惡搞，因為畀人搞即係代表自己受歡迎喎。呢首戰歌近日終於正式上載去短片分享網站，幾日內有千幾次點擊率。不過，呢首戰歌竟然停用咗網站嘅評論功能，網民冇機會留言表達意見，莫非梁博士擔心會有太多人讚佢唱得好聽，搞到好難為情？
我哋研究過「快樂西九」呢首戰歌，曲調極為重複，聽一次已經入晒腦，有網民直言首歌勁「洗腦」，相信好快全香港都會識唱咁話。我哋尋日喺一個活動見到負責作曲嘅韋然，佢話洗腦同加強訊息都只係一種形容，首歌係佢送畀梁博士，唔收錢㗎，梁博士都禮尚往來送番自己新嗰本著作畀佢，而且仲係冇錯字嘅版本添。九龍西候選名單仲有黃碧雲、毛孟靜、譚國僑、蔣麗芸、黃毓民、林依麗、黃以謙、黃逸旭。