政情：民建聯鄉事派不和 張學明唔認
民建聯同鄉事派口和心不和已經傳遍政圈，嚟緊九月立法會選舉更係各自支持唔同候選人參選，冇協調之餘，更加係連偈都冇得傾。身兼鄉議局副主席嘅民建聯立法會議員張學明尋日落荃灣圍村幫民建聯新界西候選人陳恒鑌（Ben）助選時，竟然堅決否認民建聯同鄉事派有不和，話呢啲只係傳聞，又話即使冇爭拗，鄉議局同民建聯都會分別派隊伍出選喎。
做過新界社團聯會（新社聯）會長嘅學明決定退落嚟，交棒畀兩位新社聯嫡系梁志祥同阿Ben，加埋民建聯主席譚耀宗，足足有三張名單，喺失去大部分鄉事派支持後，民建聯要取三席根本冇可能。不過，學明仍然唔肯承認鄉事派同民建聯有爭拗，仲明知阿Ben喺新界西支持度唔高，死撐對方選情唔悲觀。眾所周知，民建聯喺新界西頂多保住兩席，除咗譚耀宗外，另一席必定係留畀新社聯會長梁志祥，學明做過新社聯會長，冇理由唔清楚個局勢係點。