政情：林鄭勉首位南亞裔師姐加油
政務司司長林鄭月娥尋日去咗警察學院，為一班新紮師兄師姐結業會操檢閱，原來尋日同時係林鄭加入政府三十二周年。林鄭致詞時勉勵警員要有承擔、有熱誠兼有同理心，「承擔」就係要致力保衞港人嘅核心價值；「熱誠」就係要尋求突破，用創新方法滿足市民；而「同理心」就係要多啲設身處地去諗嘢，政策先夠到位。林鄭仲笑笑口承認，官員落區為警隊帶來困擾，承諾日後會安排好啲，減少佢哋嘅壓力。
林鄭喺檢閱一班新紮警員期間，見到一位南亞裔師姐，仲特登走埋去講聲「加油」。原來呢位女警叫Heina，係巴基斯坦裔土生土長嘅港人，仲係警隊首位南亞裔師姐，佢由細到大都係讀主流學校，講得一口流利廣東話，而佢公公都係警察，所以自細就想加入警隊。Heina話，佢嚟緊會駐守元朗區，將來希望加入警民關係科，成為南亞裔人士同警隊嘅溝通橋樑咁話。
