政情：葉劉翻撻「叛徒」陳岳鵬
新民黨主席葉劉淑儀愛將、前特首辦特別助理陳岳鵬（Ronald），兩年前丟低匯賢智庫身份及辭去南區區議員職務過檔特首辦，搞到新民黨喺有關議席補選一役中輸得一敗塗地。慘被徒弟「飛起」嘅葉太都咪話唔嬲，除咗撰文暗插Ronald係叛徒外，又喺立法會質疑Ronald嘅工作能力，更加下令旗下區議員唔可以借黨做跳板入政府，似乎師徒之情不復再，但原來Ronald最近又返番「主子」懷抱。
尋日有電台舉行立法會香港島直選論壇，赫然發現Ronald陪住葉太出席，仲透露已經重投新民黨大家庭同葉太再續師徒前緣，聲言會喺選舉期間幫葉太打電話畀地區樁腳同落區宣傳。Ronald話，佢七月卸任後去咗美國三藩市放假兼去母校史丹福大學探朋友，但上星期突然收到葉太選情告急嘅電話，仲話希望佢返港幫手助選。喺恩師兼伯樂嘅誠意邀請下，Ronald即刻以義工身份重投新民黨懷抱。
傳譚志源邀任政治助理
問Ronald係咪激嬲咗葉太，Ronald就大大聲話「無啲咁嘅事」，又話自己同葉太感情好好，可惜佢被自己紅卜卜嘅臉容出賣咗。不計前嫌嘅葉太就盛讚Ronald係人才兼叻仔，又話香港島選舉競爭激烈，想利用Ronald過往地區工作同人脈關係打贏選戰喎。記得年前Ronald「飛起」葉太加入政府後，有傳葉太明示或暗示今後唔准佢歸隊，如今為選舉連「叛徒」都用，有政圈中人形容葉太今次選舉場仗難打。
早前曾盛傳Ronald得唔到局長賞識，所以未能順利過渡新政府，但原來同Ronald有類似失意經歷嘅政制及內地事務局局長譚志源，已經力邀Ronald擔任該局嘅政治助理。不過，Ronald尋日對傳聞耍手擰頭，大呻依家仲處於「雙失」狀態，又話下月先至同大家講佢何去何從喎。不過，被問到遲啲係咪會再喺立法會見到佢時，Ronald就好大反應話：「係咩？唔知係咪呢？」似乎佢重返政府嘅傳聞可信性甚高。