中環出更：莊偉茵回味空姐歲月
服務國泰航空十四年嘅莊偉茵（Quince），快將過檔中華電力，今期「國泰天地」刊物就講述佢對舊僱主嘅感恩之情，但文字以外，更養眼嘅係入面有張Quince嘅空姐照。Quince○○年調任做機艙服務總經理，○一年考獲空姐牌，到○四年獲委任做企業服務董事前，平均每兩個月就要做一次空姐，呢張相就係佢第一日返工時影嘅，佢話當日老公同兩個寶貝仔仲特登送佢返工，相當溫馨。
總經理「降呢」做空姐，認得佢嘅同事頓時好緊張，但佢呢個「新手」都好謙虛，一樣落手落腳斟茶派包推餐車，雖然廁所唔使佢洗，但都一樣有入去執吓嘢o架。最難忘係有個菲律賓籍華人望到佢個名牌，跟住同佢相認。事緣呢位客人經常發電郵表達對國泰空中服務嘅意見，每次佢都親自回覆，所以呢次有緣相認，感覺好得意。
不過，好彩呢段空中情緣擦唔出火花，否則一定嚇親佢老公。
信國泰可應付虧損
Quince憶述，九八年入職時，國泰首次中期業績虧損，到佢本月離職又再次錄得虧損，令佢不勝感慨，但佢依然對舊公司充滿信心。值得一提嘅係，Quince離職前最後接嘅波音客機嘅註冊編號為B-HQC，剛好就係佢個英文名簡稱，為佢離開畫上完美休止符。