中環出更：名流雲集品茗賽珍珠
香港人愛品茗，最明白呷一啖靚茶帶來嘅滿足感。流傳逾百年嘅福建安溪極品鐵觀音「賽珍珠」，日前首次來港舉行名流品鑑會，吸引一眾城中名人去品茗。前民政事務局局長何志平太太胡慧中及聯合國兒童基金香港委員會主席陳晴（Judy）聯袂到場，福建幫僑領楊孫西、林樹哲、洪祖杭及晉江同鄉會會長董吳玲玲亦齊撐場。眾人以茶會友，閒話家常。
人靚聲甜嘅Judy原來係半個福建人，佢話媽媽屬閩籍，所以自細就鍾意飲茶，當日佢用流利嘅福建話同大家傾偈，零舍同聲同氣。年輕時靚絕華人影壇嘅胡慧中，一現身就受到眾人嘅讚美。盛傳何志平可能重返官場，出任政府架構重組後新增嘅政務司副司長職位，卓妮梗要追問靚太支唔支持老公復出啦，胡慧中就甜笑話：「無意見！」
楊孫西日飲四種茶
深諳茶道嘅楊孫西，對歎茶相當講究，佢話每日必飲四種茶，朝早起身先歎武夷山岩茶醒吓腦，中午飲唔太刺激嘅綠茶，令身心略為放鬆。下午時段必飲紅茶，最正梗係港式香滑奶茶，再加件奶油多士，咁就可以應付夜晚連趕幾場宴會，捱到夜晚九點至食晚飯都唔肚餓喎！經過成日勞累，佢話夜晚就飲普洱茶或湖南黑茶，包保消滯又好瞓。見佢講到咁投入，封佢做「茶仙」都不為過。
獨家秘製極品靚茶賽珍珠嘅八馬茶葉董事長王文禮，係鐵觀音發現者王士讓嘅第十三代傳人。佢話賽珍珠矜貴之處在於嚴格保持傳統嘅濃香醇厚，早喺百幾年前，八馬嘅前身信記茶行就經香港出口鐵觀音到東南亞各地，同香港好有淵源o架。
卓妮