涼亭甩批盪 疑工程求其
民政事務總署負責興建的鄉村涼亭開放未及半年牆身即告剝落，被懷疑偷工減料！劉先生發現位於粉嶺新運路的粉嶺圍涼亭牆身滲水、批盪鬆脫，質疑亭頂未有做好防水及選用劣質油漆，「個涼亭起好幾個月就搞成咁，佢哋做嘢點可以咁求其o架！入去坐分分鐘會中頭獎添！」
民政署發言人表示，涼亭由該署認可之承建商興建，使用的建築及裝飾物料均符合工程合約要求，並由北區民政處負責監督。發言人說，涼亭今年農曆新年前完工，由於施工期間天氣異常潮濕，引致部分未乾透批盪及油漆受潮濕而剝落，與工程監督工作無關，已指示承建商剷起鬆脫批盪及油漆，並待天氣穩定時進行復修。
香港建造業總工會理事長周聯橋表示，掃上油漆前，必先確定俗稱「灰底」的油漆底完全乾透，「呢啲唔可以心急，如果唔係啲油好容易甩，跟住又要執手尾，咁樣整嚟都冇意思！」周建議如需趕工起貨，可考慮使用風筒或牛角扇加快烘乾油漆底。