嬰兒食品問題多 加強監管不能拖

嬰兒食品有乜嘢問題呢？首先當然係令人聞風喪膽嘅中國製造毒奶粉啦，無良奸商殘民自肥，食你唔死都食到你殘，一係變咗大頭怪嬰，一係變咗腎石寶寶。冇耐之前，連日本奶粉都出事，多隻產品被驗出碘含量不足，長期食用有礙腦部發展，精靈活潑嘅小寶寶隨時變咗低B仔。點知話口未完，又有兩款韓國奶粉被驗出含碘量偏低，問你怕未。

潛在危機唔止咁少o架，事關現時三十六個月以下嬰兒食品不受營養標籤條例監管，食品生產商無論有心定係無意都可以造成禍患。本報記者抽查市面部分嬰兒食品，發現六成鈉含量超標，超過三成脂肪含量亦不符標準。

記者抽查嘅八款嬰兒食品之中，鈉含量超標最嚴重嘅一款係雞肉蔬菜烏冬麵，每一百千卡含有五百六十六毫克鈉，超出標準四倍半。鈉含量太多有乜嘢結果呢？兒科醫生就話嘞，鈉含量太多會加重嬰兒腎臟同心臟嘅負荷，增加日後患上高血壓嘅風險。

至於脂肪對人體嘅影響，呢家嘢相信唔使多費唇舌介紹喇啩，食得多變肥仔肥妹囉，日食夜食癡肥都有之。不過可惜吖，記者抽查嘅曲奇餅同威化餅脂肪含量超標，分別超出三成六至五成七。

嬰兒食品問題多多，香港營養學會促請政府盡快將三十六個月以下嬰兒食品納入營養標籤條例監管，並且參考國際食品法典委員會嘅標準，令家長購買嬰兒食品知所揀擇，從而保障嬰兒健康。

其實講來講去，咪就係叫食衞局以及食環署嗰一班官老爺加強監管囉，唔可以任由嬰兒食品製造商胡作非為。中國製造嘅毒奶粉之所以為禍人間，其中一個致命原因就係中國官場疏於監管，甚至官商勾結貪污舞弊縱容化學物質毒害下一代。食衞局局長高永文冇理由唔明白呢一個道理啩？如果真係唔明，咁就冇資格做局長囉，不如辭官返去做番一個骨醫算鬼數。

即係咁，嬰兒食品問題多，加強監管不能拖，一拖就愧對未來主人翁。你知啦，今日嘅小寶寶話唔定係將來嘅「牛下女車神」李慧詩，萬一食到肥騰騰又高血壓，邊個同香港贏得更多奧運獎牌呀？

最搞笑嘅係，兩款之前驗出碘含量不足嘅奶粉，食安中心再驗竟然話符合食品法典委員會標準。咁即係點？計功夫茶話齋，唔該認真少少啦，監管嬰兒食品唔可以一時一樣咁兒戲o架！