政情：劉燕卿延退休等接班人
消費者委員會總幹事劉燕卿（Connie）好耐之前已經放風話要退休，原本可望十月就開始休假享受人生，但點知忽然又要延遲一個半月。消委會尋日宣布委任現時旅遊發展局會議展覽及郵輪業務總經理黃鳳嫺（Gilly）為新任總幹事，但要喺十一月十六日才生效，換句話即係Connie要頂到十一月中先至可以退休，據講係因為Gilly喺旅發局辭職要三個月通知，由尋日開始起計算，時間啱啱好。
唔經唔覺，Connie原來已經服務咗消委會三十八年，唔少業界對佢評價正面。至於接任人Gilly係工商管理系出身，佢有廿二年管理經驗，曾於資訊科技電訊及服務行業工作，做到今年十月，佢喺旅發局工作就滿五年。
不過，唔少人擔心Gilly唔夠硬淨，佢尋日無為此回應，只係話未來仲有唔少大型活動來港舉辦，所以會趕快完成旅發局工作，仲希望可以約Connie見面同埋交流。