政情：易志明投票重業界輕黨
自由黨喺九月立法會直選腹背受敵，但功能組別三位議員就無驚無險自動當選，其中一位「新鮮人」就係航運交通界嘅易志明。一入到議會，好多時都要就唔同議題表態，但易志明就講到明，雖然自己係自由黨，但業界利益始終要凌駕黨立場，所以唔一定次次都跟住黨投票。睇嚟自由黨日後同政府拗手瓜講數時，易志明嗰票都唔係好穩陣喎。
投票唔一定跟黨立場嘅做法，其實易志明之前已有前科，但唔喺立法會，而係特首選舉。話說今年三月特首選舉投票時，自由黨班領導層大搞「白票運動」，易志明就無跟黨投白票，仲聲言做得選委，就有責任去投票，佢份人咁有性格，咪同黨友飲食界張宇人好夾？
其實易志明身兼九倉執董呢個身份，令人好自然聯想到，佢喺議會入面幫九倉講好說話，更可能影響投票取向。不過易志明講到明議題一涉及九倉利益，佢最多只係發言，一定唔投票，避免利益衝突。