政情：蘇菲梁棄選立會無時停
立法會選舉臨近，正當各候選人忙到氣咳之際，退下火線嘅經濟動力立法會議員梁劉柔芬（蘇菲梁）依然忙都無時停。蘇菲梁話，近排除咗幫其立法會「接班人」拉票拉到聲沙外，仲要昅實由佢一手一腳湊大、專搞學生活動嘅青年企業家發展局（YDC）。有「政壇小富婆」之稱嘅蘇菲梁話，咁多年議員人工都全部畀晒YDC做營運經費，唔做議員後只好靠老公足總主席梁孔德泵水支持。
對於有傳聞話蘇菲梁做埋今屆港區全國人大代表就會退休，蘇菲梁尋日澄清話，會做多一段時間先至正式退位讓賢，嚟緊十月仲會跟大隊去雲南考察。佢又透露早前同老公去美國探望八十幾歲嘅媽咪，選舉完結後會再去陪老人家兼放假散心。蘇菲梁一提起同後生仔相處就講唔停，話平時喺屋企會用理論教兩個孫仔多角度思考，遲啲仲會帶中學生參觀南蓮園池，實行親身支持青年發展。