民主黨（白鴿黨）領導層其身不正，不只一次出賣選民，早令唔少支持者心淡，改投其他政黨懷抱。白鴿黨惡行成本電話簿咁厚，我哋早兩日就講過，人民力量為撕破白鴿黨一班政棍嘅假面具，不惜用選舉資金印製名為《偽民主派賣港實錄》嘅小冊子，等市民認清呢班壞蛋嘅真面目。
今次人民力量係分期、分區咁推出呢本小冊子，繼九龍西之後，九龍東亦已經開始派發，雖然內容大同小異，不過封面就大大不同。九龍東呢本嘅封面係「鳥籠困白鴿」，唔使問都知係諷刺緊白鴿黨啦，雖然九龍東呢本嘅封面冇九龍西嗰本咁直接，但寓意就更深遠。
繼九龍兩區之後，其餘三區亦會陸續派發呢本內容咁豐富嘅好書，九龍西印足廿萬本，如果其餘幾區都係印呢個數目的話，就會有一百萬本見街，要做到人人手執一本並非冇可能，唔知屆時班白鴿見到會唔會再次抱頭亂竄，見到街坊就掉頭走呢？