政情：龍瑞卿隨時執死雞入「會」
立法會選舉臨近，各政黨已經開始評估旗下候選人嘅勝算，必要時調兵遣將。民建聯新界西共派出三隊參選，可惜除咗黨主席譚耀宗（譚Sir）之外，其餘由新界社團聯會（新社聯）會長梁志祥及新界青年聯會主席陳恒鑌領軍嘅名單，支持度同樣低迷。據聞該黨正研究安排譚Sir過票畀其中一位候選人，但發現有好大困難，最後可能惟有力谷譚Sir名單，帶挈排第二位嘅屯門區議員龍瑞卿冷手執個熱煎堆加入立法會。
民建聯今次選舉首度玩分區，每張名單負責搶唔同地區嘅選票，如果配票得宜，要令所有名單勝出並非冇可能，可惜選舉期開始後，該黨先至發覺支持者好唔習慣配票。據講該黨內部調查，以及傳媒機構嘅民意調查都顯示，譚Sir支持度有百分之十七以上，足夠帶埋排第二嘅龍瑞卿勝出，反而另外梁志祥同陳恒鑌兩隊就仍然只有個位數支持度，點計都唔夠贏。
相信大家對龍瑞卿會好陌生，查實佢同老公陳雲生都做咗屯門區議員多年，龍瑞卿有個花名叫「小龍女」，而陳雲生仲自稱「楊過」。有地區消息話，該黨喺屯門區有唔少具實力嘅區議員，起初諗住排譚Sir後面唔會贏到，紛紛拒絕披甲，如果龍瑞卿真係冷手執到個熱煎堆嘅話，相信當初唔肯排隊嘅區議員肯定好後悔，唔知包唔包括佢老公陳雲生呢？
新社聯梁志祥最受影響
不過，據聞有關方面仍然評估緊選情，如果民建聯其餘兩隊到八月底仍然係「扶不起的阿斗」嘅話，先至會採用呢個各方不討好嘅「龍瑞卿方案」。如果真係咁，最受影響嘅肯定係新社聯，事關梁志祥今次除咗用民建聯招牌外，亦同時打正新社聯個旗號，希望吸納前任會長張學明喺新界西嘅選票，而梁志祥本身亦等咗今次機會好耐，若然今鋪真係脫腳，新社聯真係顏面何存。
新界西參選名單仲有郭家麒、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯、陳一華。