中環出更：張宗豪為葉楚航設計「清」「潮」裝
上個馬季贏咗五十場馬，創出個人最佳成績嘅人氣練馬師葉楚航（Dennis），深受城中名人馬主追捧。度身訂造名牌「詩閣」（Ascot Chang）董事總經理張德祥及家人名下嘅駿駒「定做」，亦歸於葉廐，七月初馬季煞科前，就以獨贏一百倍嘅超冷姿態勝出。Dennis對此嘆為觀止，話從練十年從未見過，於是早前就約埋張德祥囝囝張宗豪（Lincoln），冒住酷熱難當嘅天氣，去馬房餵食紅蘿蔔以示獎賞。
Dennis近年衣着愈來愈潮，但係賽馬日就無得展示個人風采，因為馬會對男士嘅衣着規定嚴苛，就算三十幾度高溫，都焗住打呔着西裝，認真有苦自知。當日Lincoln就靈機一動，自動請纓幫佢設計新形象，至緊要夠潮又清涼，又唔會被馬會詐型。且看下一個馬季開鑼，Dennis會否大變身？
卓妮