中環出更：林鄭公子跳MJ舞
一直為內地偏遠貧困地區修建橋嘅「無止橋」慈善基金，嚟緊十一月又舉辦步行籌款等活動，作為慈善基金義務秘書嘅新世界發展執行董事紀文鳳（Leonie）尋日宣傳活動時，就透露政務司司長林鄭月娥嘅公子林節思同特首梁振英（CY）長子梁傳昕，都先後做過義工幫手建橋，仲大爆林節思曾經喺建橋嘅慶功宴上，大跳已故國際巨星Michael Jackson嘅勁舞助興，睇到在場嘅林鄭都忘形Ｏ嘴添！
Leonie話，當時兩位高官嘅公子做善事都好低調，全程冇表露過自己嘅身份。其實Leonie除咗專注「無止橋」工作外，原來仲有項新大計。
紀文鳳見CY夫人傾大計
話說本周一嘅下午茶時間，卓妮喺中環置地廣場見Leonie同CY夫人梁唐青儀一齊搭（車立）上餐廳high tea，尋日問番Leonie同梁太傾咩密偈，佢就笑笑口話係關於廚餘回收嘅大計喎，事關CY好關心環保議題，想做好呢樣嘢。咁啱得咁蹺，大約一個鐘後又見新世界發展執行董事鄭志剛（Adrian）搭（車立）上樓，莫非係同廚餘計劃有關？
講番尋日個宣傳活動，適逢「無止橋」成立五周年，除咗計劃喺十一月舉辦步行籌款外，年底仲會出一本名為《二十四橋明月夜》嘅書籍，結集建橋義工嘅所感所想。據講呢個書名有雙重意義，第一係紀念基金達成咗喺五個省份完成二十四個建橋項目嘅目標，其次係將個「夢」字拆開，剛剛就係「廿四月夕」，真係有意思。基金仲透露，林鄭會為十一月步行籌款活動主禮，唔知佢會唔會講吓愛兒做義工建橋嘅趣事呢？
卓妮