中電賺錢莫加價 切勿堅持做電霸

賺大錢呀,又有人賺大錢呀!

繼港鐵之後,中電又以「盈利下跌但獲利甚豐」嘅形式交出一份冇失禮街坊嘅成績單。中電公布,上半年盈利按年減少百分之四十二,賺咗三十三億五千六百萬元。盈利下跌主要由於澳洲電廠煤礦場水浸帶來六億四千四百萬元非經常支出,以及期內冇資產出售所致。

功夫茶不厭其煩再一次提醒大家,中電嘅錢係賺少咗,不過實際利潤仍然非常豐厚。喂,三十三億幾落袋喎,你都咪話唔和味,好多中小型企業捱生捱死一百年都未必賺得到!

之所以有必要強調中電賺大錢,無非要帶出一個訊息,嗱,中電有錢賺就唔好堅持做電霸,切勿開口埋口嗌加價。

中電副主席阮蘇少湄話喎,年底會同政府檢討電價調整,要考慮多個因素,包括未來幾個月燃料價格趨勢,集團嘅售電量以及營運開支。阮蘇女士又話,明年會進行利潤管制中期檢討,集團將會積極同政府以及社會上嘅持份者交換意見,改進現有管制下嘅經營。呢位副主席亦講到,政府喺二○一○年建議提升核電比例並且降低燃煤比例,但至今政府仍未公布諮詢結果,引入核能嘅政策仍未確定,集團只能內部研究有關可行性。

大家對於半年前中電獅子開大口嘅驚世一幕應該記憶猶新,主席米高嘉道理一開口就話未來幾年要加價四成,嚇到全人類鼻哥窿冇肉。咁瘋狂嘅加價構思當然激起全城公憤,政界商界男界女界無不怒髮衝冠群起而攻之。眾怒難犯之下,中電不得不讓步,宣布整體電費加幅由原本嘅百分之九點二,下調至百分之七點四。之不過咁,中電留低一條尾巴,話今次調低加幅將會令到燃料帳負結餘由八億元上升至明年底十四億,長遠而言難以負擔。言下之意就係話,呢一筆帳遲早要轉嫁畀用戶。

電力公司之所以有恃無恐隨時隨地變身電霸,罪魁禍首咪就係監管水平低得可憐嘅特區政府囉。一來,政府同兩電簽署不平等條約,容許透過利潤管制協議賺盡百分之九點九九。二來,政府不思進取,冇對症下藥引入競爭,壟斷市場嘅兩間電力公司咪為所欲為囉。

大家睇下德國吖,人哋一見日本地震搞到福島核電廠洩漏輻射,二話不說即刻宣布廢核,二○二二年前將核電廠全部關閉。點解咁把炮話廢核就廢核?原因係德國二十年前已經鼓勵再生能源,以風力發電同太陽能取代傳統電廠。德國現時再生能源嘅發電比重佔兩成,未來可望上升至八成。

唔想電霸不斷加價咩?引入競爭啦,懵丙!