政情：莊偉茵為新職做定功課
將於九月過檔中華電力出任企業發展總裁嘅莊偉茵（Quince），上星期五先至卸任國泰航空企業事務董事一職，抖暑唔夠一個星期，尋日我哋就發現佢現身中電嘅中期業績會。Quince打扮低調，仲專登坐喺記者席後排位置，密密手喺度做定功課，了解新公司嘅業務運作，果然出名勤力又拚搏。
業績會後，Quince被記者包圍，追問佢為新工準備成點、嚟緊點樣同政府商議電費加價等問題，點知佢即刻耍手兼擰頭，乜都唔肯講，淨係重複話諗住趁放假嚟上堂聽吓書，強調唔係新公司要求佢出席。
Quince又話，依家連新卡片未有，有乜嘢遲啲先講喎，之後就急急腳離場喇。