政情：陳茂波為份工大假縮水
近日忙於為「劏房風波」解畫嘅發展局局長陳茂波（Paul），未上任前曾經講話要喺呢段時間陪囡囡去美國開學，咁啱上周六就有傳媒影到阿Paul同太太許步明現身機場，但阿Paul並冇同太太一齊上機，莫非佢陪囡囡開學嘅行程計劃有變？
我哋向發展局查詢，發言人話阿Paul尋日已經上咗飛機喇，遲咗兩日起程係因為要處理私人事務。阿Paul會先去加拿大會合太太，探望兩位患病嘅家屬，然後再去美國送囡囡開學。發言人話，雖然唔知阿Paul嘅確實行程係點，但就好肯定佢下周一會返工喎。
之前阿Paul講過，會放一個長假期陪屋企人，以及去美國探望年幼時曾助養佢嘅契爺，但早前傳出佢會接任發展局局長一職後，佢就話唔排除縮短個假期，點知結果縮到得番七日。發展局發言人補充，由於阿Paul要遷就政府嘅工作，所以行程有變，所以今次應該唔會去美國探契爺喇。