政情：人民力量 踢爆白鴿賣港
民主黨（白鴿黨）過去一直恃住係泛民主派龍頭，一直食老本不思進取，而自稱「日日做漢奸」嘅創黨主席李柱銘，連同一班民主惡勢力搞搞震，總之一班老鴿以「賣港」為己任，結果搞到眾叛親離，支持度下跌。新興政團人民力量成立以來不斷撕破白鴿黨假面具，最近就趁立法會選舉印製二十萬本《偽民主派賣港實錄》小冊子，希望選民睇清楚偽民主派嘅真面目。
人民力量近日開始落區派發呢本《偽民主派賣港實錄》小冊子，封面同內容都係衝住白鴿黨而來，咪以為人民力量只係老調重彈，只係鬧吓白鴿黨支持前年政改方案咁簡單，但其實係將白鴿黨歷年來做過嘅衰嘢分類列出，每件事都寫到清清楚楚，令白鴿黨呢班賣港賊不容抵賴。
拖延彈劾 放生貪曾
先講已落荒而逃嘅「貪曾」，今年初被東方報業集團獨家踢爆佢貪盡海陸空，人民力量二月底已經話要彈劾佢，誰知一向宣稱會監督政府嘅白鴿黨，同埋公民黨立法會議員都唔知搞乜，竟然拖足兩個月先至扮嘢做大龍鳳話會支持彈劾，結果時機盡失，草草收場，白白放生貪曾。
白鴿黨嘅醜事，當然唔只一件咁少，小冊子詳列該黨嘅出賣民主、出賣民生嘅醜行，足以證明該黨惡行罄竹難書。
人民力量今次再次決心批判白鴿黨，自己代價都唔細，呢本小冊子要計算選舉經費，初版印咗二十萬本，亦直接令本身宣傳少咗。白鴿黨已經去到窮途末路，黨主席何俊仁（鐵頭仁）近日仲不斷被揭發涉嫌漏報公司股份資料同利益，但佢仍堅持文過飾非，拒絕認錯，相信該黨嚟緊選舉都係凶多吉少，選民必定要該黨票債票償。參選超級區議會議席嘅名單仲有涂謹申、馮檢基、陳婉嫻、劉江華、李慧琼、白韻琹。