中環出更：陳維安父子檔撐環保
候任立法會秘書長陳維安（Kenneth）快將上任，難得有暑假空檔，早幾日佢就同囝囝去中環ifc購物，卓妮見佢哋入咗Apple旗艦店，買咗件家居影院嘅電腦裝置，可以足不出戶睇電影。Kenneth話，依家要喺屋企欣賞電影，毋須再幫襯影碟舖，只要喺互聯網設立帳戶，就有大量心水電影可供選擇，㩒個掣，電腦屏幕就會好戲連場。
Kenneth今次購買嘅裝置，就係將電腦嘅Wi-Fi訊號轉換為電視嘅接收訊號，影像畫面可在電視播放，如此一來全家人都可以安坐家中齊齊睇電影，既省卻往來影碟舖嘅腳骨力，亦可以減少光碟嘅使用，無形中少啲消耗塑膠有助環保。
講起環保，Kenneth喺呢方面嘅意識都幾強，例如售貨員將已經付款嘅貨品放入膠袋，佢都堅持要褪番個膠袋畀對方，消費之餘亦不忘保護環境，確係囝囝嘅好榜樣。