中環出更：張雅麗母子 遊鬥牛國學畫
歐遊除咗Shopping，學畫畫都可以係個好節目。港島婦女聯合會主席張雅麗（Carol）就趁暑假飛西班牙學畫畫，仲入住畫家嘅特色環保屋，全屋靠太陽能發電，就算屋內冇冷氣，依然感到涼浸浸。原來Carol早前喺網上覓得一位獨特嘅畫家老師，於是趁七月底出席完鋼琴家郎朗喺倫敦嘅古帆船演奏會後，就慕名飛去西班牙巴塞隆拿拜師學藝，同行仲有囝囝晉熙，實行來個親子藝術之旅。
由於畫家老師住喺與世隔絕嘅小島，Carol兩母子先由巴塞隆拿坐兩粒鐘飛機，再加兩小時車程先至到達。放下大包小包行李後，Carol馬上報讀一個三天速成嘅水彩班，學習色彩、構圖等技藝。
畫家海鮮飯好滋味
畫室寧靜到極，對外通訊全靠衞星電話，Carol全情投入畫畫，眨眼完成一幅風景畫，老師都讚佢天分高。畫家屋主係環保粉絲，乜嘢都循環再用，好似洗完手嘅水，就用嚟沖廁所；至於冷氣機，當然唔會裝啦。雖然屋外有成攝氏三十八度，但屋主栽種唔少綠色植物，感覺似廿八度，好涼快。畫家每餐仲入廚煮餸，Carol話，最正係西班牙海鮮飯，滋味無窮。
卓妮