民間自救執膠 膠官遲鈍執輸

一百五十噸聚丙烯膠粒由貨櫃跌落海，罪魁禍首當然係威力強橫嘅十號風球韋森特啦，之不過咁，緊接天災而來嘅係人禍。喂，特區政府一來冇第一時間清理幾十億膠粒，二來又冇盡快向外公布壞消息，如果唔係民間人士同環保團體奔走相告，唔知幾多人對於「八月飛霜」仍然蒙在鼓裏。提到奔走相告，功夫茶真係要豎起兩隻拇指讚一讚熱血香港人，大批民眾自動自覺參與一場浩浩蕩蕩嘅執膠行動，不怕烈日當空，無懼身水身汗，執膠執得可歌可泣。

相對於執膠嘅義工，遲鈍嘅膠官就執輸嘞，事發兩星期先至舉行跨部門會議商討善後對策，仲要死撐話膠粒無毒，食落肚都唔怕，簡直係急驚風遇着慢郎中，而且呢個慢郎中有少少黃綠醫生味道。就當你膠粒真係無毒，魚類誤吞會唔會窒息而死呀？功夫茶建議發表膠論嘅膠官走去吞膠袋，然後話畀大家知有冇毒。

東方報業民意調查顯示，四成六受訪者最擔心膠粒污染影響海洋食物鏈；兩成七憂慮海岸線生態受影響；一成八恐怕進食含膠魚危害身體健康。

含膠魚呢家嘢，問題陸續浮現，不少魚排都發現死魚體內有膠粒。魚食膠，人食魚，多膠魚絕對唔應該掉以輕心。不過可惜吖，政府嘅表現真係有少少關人膠事囉。四成一受訪者認為，當局漫不經心嘅態度同市民期望有落差；兩成八覺得，反映新政府經驗不足；兩成五同意應急機制存在漏洞。

對於海事處接報後只係通知海港使用者，直至多處水域出現大量膠粒，並且由環保團體踢爆，環境局同食衞局先至交代，四成一受訪者認為當局必須改善協調機制；三成一話通報機制不足；兩成五覺得無法有效協調運作。

唉，新政府啊新政府，雖然話上台只係個幾月貨仔，所以經驗不足啫，之但係成個管治班子都唔係政壇初哥o架啦，部分人士參與官場運作十幾廿年，經驗不足唔係甩轆嘅充分理由囉。環保團體講得啱o架，膠粒污染對於整個海洋生態造成幾大傷害仍然係未知之數，除咗要加快速度清理膠粒之外，未來亦要跟進魚類死亡嘅真正原因。

天災避無可避，人禍可免則免。膠粒大災難話畀大家知，民間自救執膠係就係值得尊敬嘅愛港情懷，不過更加重要係政府機器唔好執輸，否則大海含膠，等於香江含恨，輸嘅係香港人子子孫孫！