政情：林D9臨上機梳靚個頭
自言「知所進退」嘅前政務司司長林瑞麟（林D9）卸任後「退」到英國牛津大學進修神學一年，不過一直無講幾時起行。尋日有讀者爆料畀我哋知，話見到林D9現身機場離境禁區嘅洗手間入面，林D9當時正在聚精會神咁梳靚個頭，真係一「絲」不苟。佢一見到有人走入嚟，即時處於戒備狀態，收埋把梳一支箭走人。
話說尋日朝早八點半左右，身穿西裝冇打呔嘅林D9，現身機場離境禁區嘅洗手間入面，身邊有個小型行李箱同公事包。只見林D9一手拎住把扁梳，一手撳住頭髮，學足《阿飛正傳》入面嘅梁朝偉咁，由左至右咁梳到個頭立立令。當佢見到有人走入嚟，就拿拿聲收起把梳，急急腳拖篋走人。其實貪靚梳頭都係人之常情，林D9唔使咁緊張。