兄弟姊妹啲基因通常都有啲似，所以近日喺政界有個傳聞，話九龍東候選人謝偉俊同參選建築、測量及都市規劃界嘅謝偉銓好似樣，懷疑佢哋兩兄弟想一齊入議會喎。為咗尋找事實嘅真相，我哋就致電求證。
謝偉俊一聽到我哋嘅提問就話，謝偉銓咁靚仔，自己唔敢高攀喎。佢仲透露自己都識咗謝偉銓一段時間o架喇，不過兩人絕對無任何關係。不過，謝偉俊的確係有一個細佬，但已移居美國多年，並與父母同住，每隔一至兩年就會相聚一次。至於謝偉銓就話，十幾年前已經有人話佢係咪謝偉俊嘅兄弟，佢都覺得幾好笑。不過，佢哋既無親戚關係，亦無成日見面，通常喺啲朋友聚會時先會碰頭。
九龍東嘅候選名單仲有胡志偉、黃國健、陳鑑林、梁家傑、陶君行、黃洋達、譚香文、嚴鳳至。而建築、測量及都市規劃界嘅候選人就仲有劉秀成及吳永輝。
