政情：曾德成聽民意靠晒fb
自從○九年反高鐵示威後，政府近年都喺互聯網加強收集意見，諮詢網站好似雨後春筍咁產生。民政事務局局長曾德成除咗有網誌外，民政局仲有網上論壇畀大家抒發意見，但上個禮拜三民政局仲喺facebook設立一個叫「民政」嘅專頁。網上平台已經咁充足，唔知佢有無打算下一步落區聽取市民意見呢？
德成局長猛叫網民做「鍵盤戰士」唔係第一次，幾年前已經成立咗個公共事務論壇，但咁多年嚟都無咩成效，成個論壇得七百五十個議題。但曾德成似乎對互聯網特別鍾愛，尋日喺佢自己個網誌宣布，民政局開多咗個叫「民政」嘅facebook專頁，希望同市民溝通交流下。
特首梁振英要求問責官員有政治能量，德成局長加強網上平台，唔知有無打算真正落區聽意見呢？好似近排奧運咁，佢都可以同班體育團體見下面，睇下佢哋有咩訴求，咁樣做可能會仲直接喎。