中環出更：青聯賢慧社山區教英文
青聯女子部青聯賢慧社成立短短四年，善事一浪接一浪，今年衝出香港，貢獻內地兒童，十位賢慧社委員會去清遠連山教英文，舉行一連五日名為「賢德牽學子，慧心澤連山」嘅義教團。召集人羅詠詩（Anthea）因為要到澳洲，唔可以隨行，但佢臨上機前都特別去探望副召集人周沁嘅office，傾下細節。
今次個活動只有四個月時間籌備，既要搵贊助，又要招募義工兼做工作坊，時間都好趕急，好在個個賢慧社嘅女將都好打得，三兩下手勢就搞掂晒，加上係幫助山區嘅學生，所以搵贊助都無難度，好似康泰太子爺黃進達咁，一收到電話即刻支持，非常爽快。
依家國民教育成為好多家長關心嘅課題，有兩個分別十二歲同六歲囝囝嘅Anthea都好關心，因為佢本身都有一顆愛國心，覺得身為中國人唔可以唔認識自己嘅國家，所以佢贊成呢科可以提供資料畀小朋友，只要真實反映依家嘅中國就可以，亦可以訓練小朋友明辨是非嘅能力，唔覺得會洗腦。