中環出更：鄭家純想旅行月球
神舟九號載人航天代表團訪港，星期五晚政府喺灣仔會展設宴歡迎三位航天員景海鵬、劉旺同劉洋。難得同三位「國寶」近距離接觸，唔少名人都慕名而來一睹風采，齊齊舉杯。一講起上太空，唔少大孖沙都表現興奮，好似新世界發展主席鄭家純話，如果第日真係搞得成太空旅行，佢都好想去月球行吓，畢竟呢個係好多人嘅夢想。最幽默嘅莫過於港交所主席周松崗，佢話從來無諗過要升空，因為「腳踏實地」做人最好喎！
今次神九喺太空逗留十三日，為中國航空史寫下新一頁，相信喺不久將來搞個太空旅行都並非難事。啱啱忙完家族爭產案嘅中華總商會榮譽會長霍震寰話，有機會都想上太空，但見航天員步出太空艙時步履輕鬆，笑稱自己係老人家，怕身手唔夠敏捷。
講句公道話，當時卓妮叫住霍生嘅時候，原本向前行嘅佢即時一百八十度轉身，反應極快，一啲老態都無。問佢係咪已經將所有煩事拋到九霄雲外？佢就笑笑口咁話，一路都無乜點樣，係嘥啲時間啫！
楊釗希望 人人都可上太空
裕華國貨董事長兼總經理余國春同「牛仔褲大王」楊釗都對「太空之旅」齊聲讚好，楊釗仲話，希望到時唔單止自己上太空，仲發展到與民共享，到時大家都可以做「太空人」。至於兒孫滿堂嘅全國政協委員施子清就話，自己已經七十歲，上太空呢啲計劃，相信兒孫比佢嘅興趣更大，有機會要留番畀後輩喎。
卓妮