古人話「民以食為天」，功夫茶就話「民以食為憂」。嗱，唔係危言聳聽㗎，今時今日食咩都唔安全，內地食品驚有毒，本地魚驚有膠粒，連進口嬰兒奶粉都隨時飲到低B，唔憂就假。
咪就係講緊日本奶粉囉。繼日前兩款嬰兒奶粉被驗出含碘量低於世衞標準之後，再有四款日本奶粉含碘量過低，估計逾千嬰兒受影響，搞到家長人心惶惶，無所適從。講真吖，家長買貴價日本奶粉，都係諗住品質比較可靠啲啫，點知結果啱啱相反，愛Ｂ變害Ｂ，講起都心痛！
鬼咩，港府把關不嚴，漏洞多多，任由問題食品長驅直入，想唔出事都幾難喇。就以奶粉嚟講，由於本港未有立法規管奶粉營養標籤，就算標籤與事實嚴重不符，都唔算犯法，所以咯喎，奶粉商咪有咁大作到咁大，講到天下無敵囉。歐美地區就唔同嘞，人哋規管嬰兒食品好嚴格o架，連廣告都唔畀賣添，港府幾時至可以學吓人哋呢？
講嚟講去，港府只規管成人食品嘅營養標籤，對嬰幼兒食品置之不理，根本就係本末倒置。成人食品出事，仲有其他選擇，但嬰兒食品出事，後果非同小可，除咗即時損害嬰兒健康，仲可能影響一生添，點可以咁求其o架。好似內地大頭奶粉及結石奶粉，禍害咗無數嬰幼兒，好多仲有後遺症，一生幸福盡毀；而今次本港驗出嘅缺碘奶粉，更隨時製造低B兒童，你話係咪靠害吖。
歸根究柢，最衰都係港府官僚後知後覺，得過且過，累到家長食唔安坐唔樂，都唔知點算好。有團體批評奶粉無王管，奶粉商作得就作，經常聲稱自己嘅產品接近母乳成分，但事實根本唔係；團體要求港府加強監管，將營養標籤法例範圍擴大到三十六個月以下嘅嬰幼兒食品。冇錯嘞，嬰兒健康事關重大，規管奶粉刻不容緩，當局責無旁貸o架。
話時話，今次發現嘅缺碘奶粉可能只係冰山一角咋，呢啲奶粉究竟喺本港賣咗幾耐、仲有幾多問題奶粉未被發現、影響嬰兒健康嘅程度有幾嚴重等等，當局到依家仲未能夠清楚交代。食安中心助理署長李小苑大安旨意咁話，毋須限制日本奶粉喺本港銷售，至於訂立奶粉營養素含量及營養標籤嘅規管方案，立法需要時間喎。唉，急驚風遇着慢郎中，缺碘奶粉搞到家長人心惶惶，堵塞漏洞不容再拖，好心當局咪咁官僚喇！
「民生無小事」，講就係咁講，但究竟做唔做得到呢？計功夫茶話齋，關乎嬰兒健康嘅食品更加無小事。正所謂，幼吾幼以及人之幼，如果當局連嬰兒都保護唔到，仲點樣講民生吖！