特首梁振英開局不利，一個發展局局長搞到滿城風雨，先有麥齊光做了「最短命局長」，後有陳茂波「劏房」糾纏不清！
反對派喉舌與一眾惟恐天下不亂的政棍，有理冇理，就係要梁振英及其班子「下台」，一味四圍點火，勢要CY冇啖好食，最好就係「參透色空真境界，一瓶一鉢走天涯」，最後，由反中亂港嘅不知所謂者來管治香港，咁香港就有明天，個個唔使做都可以快活勝神仙！
陳茂波出來解釋「板間房非劏房」，你哋又話人玩文字遊戲，又話開記者會恰在「神九」航天員訪港之時舉行，又臨近周末，企圖淡化事件……如今，特首梁振英個廚房，確係熱爆！無論佢有乜舉動、任何施政，即使利民解困，都係有「陰謀」、不可告人之目的，或藉此討好大眾！這正是《伊索寓言》裏騎驢的故事：話說有兩父子帶咗隻驢入城；起初兒子騎老竇拖，路人甲就怒罵兒子不孝，點可以自己騎而讓老父走到身水身汗？於是，父子倆掉轉位置，路人乙又罵做父親的，怎忍心若此！於是，兩父子一齊騎驢，路人丙振臂大吼：你兩個咁鬼殘忍，係唔係想騎死隻驢，虐畜啊！
父子倆只好都不騎驢，路人甲乙丙又齊聲罵父子倆蠢過隻豬，有驢不騎情願行路！搞來搞去，父子倆惟有紮起隻驢，抬進城去。
CY要做實事，一眾局長要拿政績贏取市民信任支持，「香港文革」咁搞落去，唔知又要蹉跎幾多歲月！