政情：紅白藍選票玩殘政黨

選舉管理委員會主席馮驊早前出嚟已清楚介紹紅、白、藍三色票箱，紅色代表功能界別，白色代表超級議席，而藍色就代表地方直選，但就未有交代選票嘅詳細設計及式樣。政府大唱「紅、白、藍」做宣傳，大家梗係以為選票會分別印上呢三種顏色啦，點知有參選團隊睇過官方嘅模擬選票，原來選票正面劃一係白底黑字，只係背面以唔同顏色嘅兩條橫間區分，最離奇嘅係所謂嘅白色選票背面印有嘅竟然係兩條灰黑色橫間，認真騎呢。

我哋就選票設計問過唔同政團，原來民建聯一直以為藍色選票係成張藍色、白色選票就成張白色，冇諗過只係喺選票背面用唔同顏色區分，質疑背面分顏色點區分到呢？該黨仲跟晒政府宣傳，諗住喺街站擺放唔同顏色票箱，仲整緊迷你版模擬選票添，完全被政府玩殘。據講民協亦被政府誤導，佢哋喺宣傳單張上已經印咗全張白色同全張藍色嘅模擬選票式樣，結果得不到預期宣傳效果之餘，仲要花一輪唇舌去同街坊解釋。

心急惹禍 錯印模擬式樣

不過，有政黨就大嘆好彩，因為冇諗過咁快印製模擬選票去教選民投票，否則分分鐘要丟棄，批評政府嘅「紅、白、藍」宣傳真係嘥氣，又建議政府喺選票正面嘅上角貼番張顏色貼紙以作識別。今次政黨印錯模擬選票，皆因太過心急，未等到官方選票推出，就諗住搶先自製顏色模擬選票去教選民區分選票，期望地方直選及超級議席兩票都成為囊中物，可惜最終搞錯晒，亂上加亂。