中環出更：項明生遠征撒哈拉避暑
足迹遍布世界嘅Sony Computer Entertainment香港分公司董事項明生（James），上月先至預告年底會去撒哈拉沙漠尋幽探秘，點知轉個頭佢頂唔順香港悶焗燥熱嘅天氣，提早執行李展開旅程。James預咗今次唔係去歎世界，所以帶咗半箱咁多嘅杯麵同糧食一齊上路。不過，佢沿途見到自細嚮往嘅沙漠景色，幾辛苦都甘之如飴喇！
上周三臨出發前，James坦言心情忐忑，事關快將睇到夢中嘅沙漠風貌。佢自細已係著名作家三毛嘅小粉絲，三毛作品中最膾炙人口嘅《撒哈拉的故事》，對佢影響十分深遠，初出茅廬時，James就試過孭住背囊去歐洲流浪四個月。
住民宿如酋長王宮
今次遠征世界最大嘅沙漠，先經杜拜轉機，經過廿個小時嘅航程及轉機等候，再坐四小時火車，終於到達摩洛哥嘅精神首都達菲斯。當地氣溫高達四十五度，期間入住由十七世紀豪宅改建嘅特色民宿，James形容恍如進入一千零一夜嘅酋長王宮添！