中環出更:「潮青」換屆 無縫交接

七月起又到各大青年團體換屆時,人才濟濟嘅潮州商會青委,九月都換屆。卸任在即嘅青委主任陳光明(Johnny),日前搞任內最後一次午餐會,一眾「家己冷」畀足面支持,從事啤酒代理嘅候任青委主任葉振南(Stephen)都鼎力撐場,兩人碰頭熱情握手,為順利換屆做好無縫交接。

眨眼做完兩年青委主任,臨別秋波,Johnny請來律政司司長袁國強講吓調解話題,交流氣氛熱烈。Johnny功德圓滿,係時候交棒畀Stephen,佢亦與一班廣州市政協老友起程,齊齊遊敦煌及蘭州輕鬆吓。Stephen都趁上任前遊潮州充電,此行係以中區少年警訊名譽會長會副主席身份,帶五十位青少年探訪山區一間中學,送贈千本圖書;又參觀汕頭特警總部,再品嘗地道有機美食。快將升呢做主任,Stephen話會落力推薦更多潮青擔任公職,發揮所長。

廖偉芬開餐廳 最叻交租

潮青的確叻人多,好似廖創興家族後人廖偉芬(Jennifer),就寧願放棄建築師高薪厚職,喺沙士後開餐廳創業,依家擁有五間餐廳及八間咖啡館,好叻女。廖家擁有大把商舖,但Jennifer唔想做「伸手牌」,自己租地方,佢笑言細佬廖偉麟最叻收租,自己就最叻交租喎。

同場仲有永遠名譽會長莊學山,莊主席近年熱心發展社企,除成立高檔針織品牌L plus H,近日仲出埋手袋,心願係打造成為香港名牌,等班香港工廠工人,繼續保住飯碗。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報