一波未平，一波又起，食品問題源源不絕浪接浪，簡直令人煩不勝煩。
功夫茶尋日先至講過，不但中國製造嘅國產奶粉得人驚，連日本奶粉都出現含碘量不足嘅問題，隨時害到BB仔變成腦部發育不健全嘅低B仔。今日又要向大家發出一個警號，小心即食產品靠害呀！
呢嗱，就咁，內地嘅國際食品包裝協會由五月至八月做咗一個檢測，睇睇全國一次性紙質餐飲包裝到底係乜嘢情況。檢測結果顯示，六成即食產品例如即食麵嘅包裝杯外層含有螢光性物質，好衰唔衰呢一類物質又超標。螢光性物質超標嘅後果可大可小o架，隨時透過口部同皮膚進入人體，積聚體內導致免疫力削弱，更加有致癌嘅可能。簡單咁講，好多即食產品嘅包裝杯有毒！
喂喂喂，內地嘅國貨有事，等於港人同胞面對潛在風險，鬼叫偉大祖國係香港最大嘅食品供應源頭咩，上面如果唇亡，下面就會齒寒。問題食品種類包括奶茶、麵、米線同粉絲等等，本報記者去本港市面巡查過o架喇，發現部分問題食品到處有售，消費者一個唔覺意就會誤墮螢光性物質嘅陷阱。
因乜事幹即食產品嘅包裝杯外層螢光性物質超標嘅呢？原來同中國紙製品標準以及生產成本有關。現時中國紙製品標準之中，對於外層用紙並無明確要求，部分檢測機構只會考究直接同食品接觸嘅內層螢光性物質，外層懶得理。
當然仲有一個原因啦，內地奸商特別多吖嘛，為咗降低成本咯喎，乜都做得出o架。即食產品嘅包裝杯外層有可能係來歷不明嘅廢紙，問你怕未！
唉，講來講去香港人真係命苦，幾乎一日三餐進食國貨，偏偏國貨弊端長揭長有，氾濫成災嘅黑心食品唔知幾時殺到埋身。一時係孔雀石綠，一時係三聚氰胺，家陣又話食品包裝有毒。所以咯喎，食衞局局長高永文真係任重而道遠，食物安全中心絕對唔應該一次再一次把關不力。係呀，防線唔可以再失守，否則死得人o架，高局長如無意外賠唔起囉。
為咗大眾身家性命安全着想，功夫茶不厭其煩講多次，高永文必須做好食物同衞生嘅守護神角色，千祈千祈千祈唔好淪為另一個周一嶽。你知啦，前局長周一嶽有名你叫周一鑊，唔孭鑊，唔安樂，現任局長唔容許重蹈覆轍！
既然食安中心驗得出日本奶粉含碘量低於世衞標準，咁就唔該驗一驗來自內地嘅食品包裝，如果發現螢光性物質超標，當然一律封殺唔准賣啦。
總而言之，食品包裝又有毒，防線唔嚴唔舒服，負責把關嘅官僚萬萬不能死蠢瞌眼瞓！