政情：潘少直入立會唔使抽籤
九月立法會選舉如箭在弦，各大政黨嘅新生代早前為咗爭參選機會出盡法寶，不過呢個爭崩頭嘅局面冇喺勞聯出現，據聞勞聯勞工界議員李鳳英鐵定退下火線後，有人仲講笑話如果無人肯接棒，可能要喺勞聯廿幾個核心成員當中抽生死籤，當然最後主席潘兆平（潘少，圖）當仁不讓接棒，最後仲喺無對手下自動當選，呢個幾乎要抽籤嘅情況先冇出現到。
英姐做咗十二年勞工界議員一直表現得恰到好處，發言更係好有內涵，身為議會新丁嘅潘少都咪話冇壓力，據聞好多勞聯屬下屬會都對佢好有期望，潘少其實對此都有晒心理準備，自爆本身打算做全職議員，計劃入到立法會後至少會加入人力、公務員等事務委員會喎。
不過一個人始終得廿四小時，適逢明年四月勞聯舉行換屆選舉，潘少話，希望到時大家可以分工合作，明眼人都睇得出潘少或者會放棄連任主席一職，究竟邊個會接班成為勞聯新舵手，呢個大家要拭目以待喇！