政情：許漢忠十號波遙控大局
早前颱風「韋森特」襲港掛十號風球，身為機場管理局行政總裁嘅許漢忠都話呢個風好犀利，十幾年嚟都未試過咁勁，有旅客明明到咗香港，都要喺機上面坐六、七個鐘先可以落機。雖然嗰晚佢唔喺赤鱲角當值，但喺屋企一樣無覺好瞓，因為要做遙控工作，無得鬆懈。講到好多旅客滯留，又有地勤人員捱打，佢話呢啲個別事件，佢都好無奈，不過機管局咁大個機構，大家同事亦夾咗好多年，有晒默契，應變無難度。
不過工作咁忙，要陪太太就可能無咁多時間，好在許太仲有兩個後備情人，仲會請佢去旅行添，佢哋就係做緊律師嘅大仔Chester同做投資銀行嘅細仔Bosco，梁太話兩個仔數學出色，大學都係主修工程系，之後先再選唔同專業，依家兩個都出嚟工作，所以每年都會請佢同許生去旅行，兩個仔咁生性同孝順，許漢忠喺打風期間要遙控大局，都唔會覺得辛苦喇。