政情：內會主席「候選人」曝光
立法會選舉誰勝誰負有待揭盅，其中自由黨主席劉健儀轉戰港島，始終有一定風險，萬一Miriam（劉健儀洋名）落敗，建制派將要搵人頂替其內務委員會主席一職，所以近期政界已將焦點推前，開始競猜下屆內會主席人選。由於民建聯已有曾鈺成做主席，無可能再搶埋內會主席嚟做，而工聯會又有興趣發炮多過主持會議，所以最近傳出多名內會主席人選，睇嚟分分鐘有人冷手執個熱煎堆。
內會主席雖然不似得立法會主席咁德高望重，但內會主席算係立法會第二把交椅，因為主席唔在場，就由內會主席話事，所以素來有「細主席」稱號。不過內會主席唔止要熟悉《議事規則》，最重要係擺平各方政治勢力，唔能夠偏幫建制或泛民，所以無番咁上下資歷，都壓唔住場。
陳健波認有人搵佢出任
有政界人士已經預計，如果Miriam不幸落敗，第一個彈出嚟話要做內會主席嘅，應該係新民黨葉劉淑儀，因為葉劉淑儀邊個崗位都有興趣，成功當選內會主席，一定能夠推高曝光率，不過仲要視乎佢一旦當選後，有冇機會入行會。保險界陳健波就承認，近日有人叫佢試吓做內會主席，但相信都係講笑居多，而自己亦無乜興趣做內會主席，認為自己議會資歷太淺喎。
除此之外，政界仲傳出兩名人選，呢兩人就係金融界吳亮星同商界（一）林健鋒。前者中資味道太重，且已離開立法會多年，所以未必獲其他建制派支持，而林健鋒更加話諗都無諗過。其實內會主席另一職責，係每個禮拜都同政務司司長林鄭月娥會面，換言之有咩消息都係最快知道，如果識得好好利用呢啲位，政治能量必定倍增，咪睇現階段大家好似唔志在，實際係呢個位必引起一輪激鬥。
劉健儀、葉劉淑儀同曾鈺成都喺港島出選，喺港島出選嘅名單，仲有單仲偕、許清安、勞永樂、劉嘉鴻、鍾樹根、吳榮春、陳家洛、王國興、吳文遠、何秀蘭同何家泰。林健鋒、吳亮星同陳健波都已經自動當選。