政情：黃偉綸 抽空過兩人世界
特首辦同政府新聞處今年可謂喜事重重，繼幾乎長駐特首辦嘅新聞處處長黃偉綸（Michael）年初同太太誕下麟兒後，啱啱履新幾日嘅特首辦助理新聞處長歐陽力（阿Nick）亦預計會喺十一月榮升老竇，據聞喺個龍女嚟嘅。
阿Nick話，雖然佢可以享受到公務員五天男士侍產假嘅新政策，但新任特首梁振英提出嘅雙非零配額措施，要等到明年先至實行，令佢早喺太太懷孕七個禮拜時，已經要訂定私家醫院分娩床位。最近佢連工人都搵定，認真係個廿四孝老公同老竇。
Michael嘅囝囝已經有半歲大，Michael不時會將囝囝嘅趣致BB相放上網畀親友睇。Michael太太、任職民政事務總署嘅陳穎韶（阿May）做咗立法會超級區議會議席選舉嘅選舉主任，臨近投票實忙到飛起。Michael就話佢同太太喺返工同湊仔之餘，點忙都會抽啲時間過吓二人世界，增進夫妻感情。