政情：天馬行空 林奮強多嘢講
暑假又到喇，行政會議亦會放假兩星期，特首梁振英（CY）尋日起休假五日，抖一抖氣。但講番行會，自從CY上任後，行會真係改變咗唔少，除延長咗會議時間、縮短咗暑假外，討論亦熾熱咗，言論比以前自由咗。
據了解，因為貪曾唔係一個開明嘅人，行會成員以往開會時，發表意見時都就住就住，以免講錯啲唔啱貪曾聽嘅意見被寸，所以佢哋惟有收聲講少句，咁樣開會當然好有效率喇。不過自從CY上場後，成員都變得踴躍發言。聽聞CY喺行會入面好少出聲，而會聽意見，所以成員可以暢所欲言。
行會成員當中，原來最多意見嗰個就係「香港黃金五十」創辦人林奮強，佢無論喺發表意見嘅長度，又或者頻率方面，都無人匹敵，仲多嘢講過張志剛。聽聞佢啲意見都幾有見地，有數據且有道理，只可惜未必合乎現時政治環境，有啲天馬行空。如果佢喺政治圈子時間耐啲，或者佢啲意見會愈嚟愈啱用。