中環出更：患眼疾 余錦基帽不離身
夏日炎炎陽光猛烈，好多人都戴番頂太陽帽遮擋強光，香港汽車會會長余錦基（Lawrence）近日亦經常戴帽示人，但佢唔係怕曬黑，而係因為身患眼疾，要與帽為伴。佢笑言，只要配搭得宜，戴帽都係一種時尚，配西裝一樣掂。
Lawrence連進食都帽不離身，佢自爆早前發覺對眼唔多妥，急急腳去睇醫生，證實患上青光眼及白內障，可幸眼疾唔算嚴重，藥物控制下毋須做手術，只要避免雙眼與強光接觸就得。不過，點解佢唔選擇戴太陽眼鏡呢？原來佢有老花，怕戴黑超影響視力喎。為咗襯衫，Lawrence就仲特登買多幾款靚帽配搭。
Lawrence近月再度抱孫，加埋共有三個男孫，屋企變得好熱鬧。佢一講孫仔即甜到漏，大讚孫仔嗲功一流，氹得佢兩公婆整日笑不停。不過，佢坦言未滿足，仲想追多個孫女添。