香港自詡區域航空樞紐，點知呢塊招牌弱不禁風，被一場十號風球吹到一仆一碌。嗱，上周強颱風韋森特襲港，本港航空交通大混亂，大批旅客被集體放飛機，滯留機場幾日，咁已經夠丟架啦，殊不知問題陸續有來，今次揭露嘅係地勤人員搵命博。
做地勤啫，又唔係拆地雷，點解要搵命博呢？係咁嘅，威脅機場地勤人員安全嘅並非來自地底，而係來自天上，每次風暴來襲，就係佢哋被迫以身犯險嘅生死時刻。民航工會投訴，民航處同機管局一直無訂立颱風下嘅工作指引，今次十號風球之下，唔少停機坪員工仍要冒險戶外工作，其中有人駕駛無篷車輛運送行李時仲中咗頭獎，被強風吹起嘅車頭蓋擊中頭部，需要送院治理。
俗語話，上有好者，下必甚焉。既然當局漠視員工安危咯喎，航空公司就更加有恃無恐，明知風速超出安全限制，依然罔顧安全要求地勤人員去開啟機艙門，簡直係搵地勤人員嘅安全較飛。
香港機場號稱全球最先進、最安全，但係管理就立立亂，員工安全毫無保障，咁又點稱得上係「全球最佳機場」呀？訂立颱風工作指引係手板眼見工夫，連咁簡單嘅事都做得咁粗疏，鞏固航空樞紐地位又從何談起呀？大吉利是講句，萬一「全球最佳機場」變成「全球最危機場」，咁唔只令香港蒙羞，仲隨時爆大鑊添吖！
話時話，機場管理千瘡百孔，員工欠缺嘅何止颱風工作指引，仲有颱風工作夥伴。工會踢爆，近兩年機場出現人手荒，粗略估計各工種仍然欠缺五、六千名人手，以目前人手編制，根本不足以配合機場嘅發展，日後建成第三條跑道，人手更加短缺，勢必影響運作，令服務水平下降。
其實，機場服務水平早就下降咗啦。呢，颱風過咗幾日，滯留旅客遲遲都未疏導得晒，搞到怨聲載道，航空公司管理混亂固然係禍首，機場員工人手不足亦係死因。
所以話，一場十號風球就將香港航空樞紐嘅美麗外殼吹破，旅客滯留，員工不足，地勤搵命博，簡直烏龍百出。老實講吖，如果機場管理弱不禁風，就算起多十條新跑道都無用啦，有硬件，冇軟件，新客源消化唔到，盞食滯添！
一句講晒，機場管理已經拉響警號，唔該當局快快採取防風措施，否則，下次再嚟一場颱風，航空樞紐塊招牌隨時被吹走o架咋！