政情：工總兩巨頭 為她做阿四
自從爆出前房屋及規劃地政局常秘梁展文轉職商界涉嫌利益衝突事件後，公務員事務局往後審批退休高官離職再就業申請時，一切都揸正嚟做，連過檔非商業機構都無得傾，無辜令工業總會（工總）成為苦主。話說前商務及經濟發展局副秘書長蘇家碧（Linda）七月初加盟工總，原本諗住接替已離任嘅行政總裁（CEO）邱達宏，點知Linda嘅再就業「冷河期」仲未過，唔可以從事同政府及外界接觸嘅工作，於是乎工總嘅對外工作就搞到要由正副主席兩大巨頭做阿四頂住先。
Linda喺一○年離開商務及經濟發展局，先過檔康文署擔任市場及業務拓展總監，到上月再加盟工總嘅大家庭。不過，當初政府規定佢要過兩年「冷河期」，期間唔可以從事喺政府相關嘅工作，計一計日子，佢要到明年初先至解禁。正因為咁，原本打算擔任CEO嘅Linda，依家暫時要屈就做住總經理，掌管內部人事及財務工作，但係工總送往迎來嘅對外工作多如牛毛，邊個做住先呢？咪就係主席鍾志平（Roy）及副主席劉展灝（Stanley）囉。
夾好行程輪更「署理」
「電鑽大王」阿Roy同鐘錶業老行尊Stanley都係大忙人，要佢哋變相幫Linda打半份工，認真有啲為難。不過，兩位大男人都好體貼，已疊埋心水做好呢份「替工」。Stanley話，佢同阿Roy已經夾好晒未來幾個月嘅行程，兩人唔會同時離港公幹，仲話可以趁機會學嘢添！阿Roy就笑稱，「署理CEO」得來不易，其他人咪使旨意搶咗呢份工喎。咁又係，佢哋可能已經創造歷史，成為工總成立逾半世紀以來，首宗第一、二把手輪更兼做CEO案例。
據講Linda早前見到工總公開徵求CEO，於是寫信應徵，並且向政府申報轉工。工總收到佢嘅申請後，試過私底下同政府摸底，會否對前高官轉職非商業機構網開一面不加限制，但得到嘅結果係「No」，即維持判決，所以工總對此並無特別不滿。Linda係官場叻女，如果做工總CEO，肯定好幫得工業界，尤其係同政府拗數，簡直如虎添翼，難怪工總班老闆咁有誠意，甘願做阿四等候伊人回復自由身喇！