中環出更：童年孫穎練琵琶 彈到指頭出血
呢個幸福時代，如果話小朋友學樂器要學到出血嘅話，相信好多家長聽到都會嚇呆。有「鋼琴公主」之稱嘅孫穎，四歲開始學鋼琴，七歲開始學琵琶，正所謂「台下十年功」，要學好一門手藝絕不簡單，所以當年佢喺孫爸爸嘅督促下，每日要彈琵琶四小時，真係一刻都無放鬆，仲彈到手指頭都流血，方能掌握琵琶嘅入門技巧，所以話呢，呢個世界邊有免費午餐？
國寶級鋼琴大師劉詩昆前晚喺尖沙咀文化中心舉行第十屆香港少年兒童鋼琴大賽頒獎禮，孫穎呢位大師姐當然要到場支持師傅啦，除咗擔任頒獎嘉賓，仲即場表演，喺參賽者前盡顯功架。孫穎話，香港嘅小朋友學習音樂，都係以陶冶性情，提升文化修養為目的，加上物質條件太好，好難要求佢哋廢寢忘餐咁去練琴，反觀內地好多小朋友就希望能夠透過刻苦鍛煉出人頭地。
不過，孫穎話香港要出到好似李雲廸、郎朗呢啲鋼琴大師亦唔係冇機會，而佢就好欣賞港產放洋嘅鋼琴神童沈靖韜，但縱有音樂天分，亦要苦練「童子功」打好基礎，因此劉詩昆希望中港兩地嘅小朋友透過音樂比賽促進交流，互相觀摩。
張瑋傑囡囡係劉詩昆徒孫
頒獎禮前，卓妮見到仁愛堂總理張瑋傑伉儷帶埋四歲囡囡Tisha提前入場，原來Tisha係劉詩昆嘅徒孫，早幾個月孫穎喺一個慈善舞會上見到Tisha係可造之材，於是穿針引線締結師徒緣分。張太就大讚劉詩昆好關心學生，就算假日都會去了解學生嘅學習進度。雖然Tisha只係拜咗師三個月，但張太對囡囡可以發揮音樂才華已經好滿足，今次仲特登攞埋自己本新書嚟送畀孫穎，答謝佢呢位「伯樂」。
卓妮