香港警察最近做咗一件好事，就係雷厲風行掃蕩蘭桂坊。《東方日報》及《太陽報》冇耐之前一連兩日大篇幅披露蘭桂坊變咗九反之地，既有賣淫又有販毒，仲有人利用俗稱「炸彈」嘅迷姦水作奸犯科，警方即刻高度重視，二十四小時之內兩度出動反轉老蘭。警方第二次掃蕩老蘭嘅反罪惡行動代號OMEGA，警員浩浩蕩蕩直搗黃龍，仲派出緝毒犬協助。
功夫茶點解要講番呢件事？原因係保安局局長黎棟國講咗一個壞消息，今年上半年整體罪案增加一百四十一宗，其中詐騙、刑毀同盜竊案有上升趨勢。黎局長又話，暴力罪案較去年同期增加十七宗，包括強姦同非禮等等，涉及嚴重毒品罪案有一千零六十一宗，較去年同期增加兩宗。
喂，既然整體罪案增加，收咗納稅人錢個個月出糧嘅警方，當然有義務撲滅罪行除暴安良啦，唔通任由香港逐漸沉淪為黃毒賭遍地開花嘅罪惡之都咩！
講到暴力罪案增加，功夫茶馬上諗到一宗「完美犯罪」。有一個殺人犯叫做吳雅倫，如果唔走上一條成魔之路，應該都係一個相當有智慧嘅聰明人。呢一個犯罪天才謀財害命不留痕，殺人之後冒充死者去銀行出示身份證簽名提款，最勁係識得由內地偷渡回港製造不在場證據。好彩嘅係天網恢恢疏而不漏，警方最終憑少少蛛絲馬迹將呢個殺人犯繩之於法。
完美犯罪喺高等法院經過兩星期審訊，全女班嘅七人陪審團一致裁定被告吳雅倫謀殺罪名成立，法官依例判處終身監禁，扑錘之時不忘講多句：「你行為實在十分卑劣！」審訊期間一直表現囂張嘅被告，聞判後揚起嘴角向公眾席冷笑。
之所以提到呢一宗完美犯罪，無他嘅，提醒一下黎棟國咁解囉。黎局長呀黎局長，警方真係要鐵腕滅罪o架，唔可以任由前朝政府繼續遺禍人間。你知啦，執法者一旦懶於執法，變相鼓勵犯法者勤於犯法。前朝曾蔭權政府正正係疏於職守，先至搞到蘭桂坊烏煙瘴氣，治安江河日下。家陣新政府上場，係時候撥亂反正o架喇。
即係咁，不要完美犯罪，只要完美滅罪，滅罪方向自然包括打擊貪官。咦咦咦，咪住先，前特首曾蔭權嗰一單畸屎到底查成點o架？貪曾醜聞都發生咗幾個月啦，改朝換代亦已經塵埃落定，負責調查嘅廉署仍然欠香港人一個交代喎。
無論如何點都好，身為上司嘅黎棟國固然有必要敦促警方撲滅罪行，另一方面特區一眾高官同樣有必要以身作則，唔好餐餐知法犯法玩僭建吖嘛，好鬼死肉酸o架！