新政府上場一個月，好多局長都未有副局長做副手，唔知保安局局長黎棟國係咪等得太心急，尋日忍唔住自爆一兩日內會公布副局長人選。話說尋日有報道話警務處副處長李家超將提早退休，接任保安局副局長一職，黎棟國尋日出席撲滅罪行委員會會議後，就被追問幾時先公布副局長人選，以及揀選副局有咩準則。黎棟國開頭都好淡定話，要將個問題答得「闊一啲」，又話特首做到決定嘅時候，就會適時向大家公布。
原本諗住耍吓太極，拉埋老細落水就一定過骨啦，點知記者再追問佢口中所謂「適時」即係幾時？黎棟國就叫大家毋須執着於一兩日嘅時間喎。其實新政府局長似乎都有自成一格嘅「自爆的藝術」，最經典嘅係環境局局長黃錦星上任前，被追問係咪會做局長時，忽然就預言「我星期四會回應」，結果新政府真係「如期」公布任命，至於黎棟國今次嘅預言有幾準，大家都唔使執着一兩日時間，相信好快就會知o架喇！