政情：王桂壎自爆飯局惹攻擊
立法會法律界兩名參選人前律師會會長王桂壎（阿壎）及泛民大律師郭榮鏗（Dennis），尋日喺電台節目同場辯論，兩人對各項法律及政治問題嘅觀點幾乎完全一樣，唯一唔同係阿壎自爆早前曾經同中聯辦人員食飯，Dennis就立即批評佢咁做好唔啱，講到好似犯咗乜嘢彌天大罪咁。
如果咁都有罪，當年多名泛民首腦直入中聯辦參與政改談判，咁佢哋係咪應該退出政壇謝罪呢？
與郭榮鏗選戰交手
其實阿壎已經講得好清楚，約兩個月前同一位中聯辦部長級人員食飯，對方問佢係咪有興趣參選，就係咁多，唔涉及任何干預、勸進或枱底交易。
法律界向來都係泛民嘅票倉，但今屆改由資歷較淺嘅Dennis參選，對戰資歷較深嘅阿壎，的確係一場硬仗，因此Dennis好自然係將阿壎視為建制派，火藥味甚濃。
偏偏阿壎對平反六四、取消功能界別、人大釋法、以至國民教育嘅立場，都同泛民全無分別，令Dennis無位可上，惟有借呢餐飯局大作文章囉。